Nýr samningur um dagblaðamælingar

Nýlega var skrifað undir samning um nýtt form mælinga á lestri dagblaða hér á landi. Samningurinn snýst um símælingu á dagblaðalestri og netmiðlaheimsóknum sem Capacent Gallup mun framkvæma fyrir samstarfshóp um fjölmiðlarannsóknir. Í hópnum sem skrifaði undir samninginn eru SÍA og stærstu dagblaðaútgefendur landsins ásamt Birtingahúsinu, Góðu fólki auglýsingastofu og MediaCom Íslandi.

Mælingar verða í formi samfelldra símakannana í stað dagbókarkönnunar eins og verið hefur. Nú er unnið að samningi um mælingar á lestri helstu tímarita og vikublaða, í samvinnu SÍA og helstu útgefenda. Einnig er unnið að gerð samnings um rafrænar mælingar á helstu ljósvakamiðlum.

Fagráð um útfærslu dagblaðamælinga
Sett verður á fót sérstakt 5 manna fagráð sérfræðinga, sem í eiga sæti fulltrúar verkkaupa og verksala. Fagráðið verður samstarfshópnum til ráðgjafar um útfærslu á samningnum. Gerðar verða mælingar á lestri dagblaða á vegum aðila í samstarfshópnum, lestri á sérblöðum þeirra, netmiðlum og efnisþáttum blaðanna og niðurstöðum skilað fjórum sinnum á ári. Svör við sérstökum gæðaspurningum verður skilað einu sinni á ári.

Könnunin byggir á eftirfarandi úrtaki:

  • Dagblöð (aðalblöð): 2400 svör í 12 vikur.
  • Vikuleg sérblöð: 800 svör í 4 vikur af 12.
  • Netmiðlar: 2400 svör í 12 vikur.
  • Efnisþættir: Breytilegur fjöldi svara í 4 vikur af 12.
  • Gæðaspurningar: 800 svörum úr netkönnun.

Helstu atriði í mælingaaðferð

  • Lestur dagblaða verður mældur með samfelldum símakönnunum.
  • Spurt verður um lestur dagblaða daginn áður (e. “day after recall”).
  • Komi blöð ekki út daglega verður spurt um lestur á útgáfudag og daginn eftir útgáfudag.
  • Spurt verður hvort blað var lesið eða því flett og hve lengi blaðið var lesið.
  • Einnig verður spurt um áskrift eða hvort blöð hafi borist á heimili.
  • Safnað verður 200 svörum á viku í 50 vikur á ári.

Mæling á vikublöðum og vikulegum sérblöðum

  • Mæling á sérblöðum og vikulegum sér- og fylgiblöðum aðalblaða verður gerð í símakönnun samhliða mælingu á dagblaðalestri.
  • Spurt verður um lestur á síðustu 7 dögum, hve mörg af síðustu 4 tölublöðum og lestur á sl. 3 og 12 mánuðum.
  • Mæling á minni sérblöðum verður valkvæð fyrir hvert blað.

Mæling netmiðla
Notkun netmiðla verður mæld með sama hætti og grunnmæling aðalblaða (”day after recall”), hve oft netmiðill var heimsóttur á síðastliðnum 7 dögum og hvort netmiðill hafi verið heimsóttur á sl. 1, 3 og 12 mánuðum.
Spurt verður um aðgang að interneti á heimili, skóla eða í vinnu.

Gæðaspurningar
Safnað verður gögnum í 4 vikur af 12 mælingavikum á ársfjórðungi og niðurstöður birtar tvisvar á ári.

Mæling efnisþátta

  • Mæling efnisþátta dagblaða er valkvæð. Dagblöðin ákveða sjálf hvaða efnisþættir skuli mældir.
  • Mældur verður lestur á efnisþáttum meðal þeirra sem lásu viðkomandi eintak af dagblaði.
  • Safnað verður gögnum fyrir hvern efnisþátt í 4 vikur af 12 mælingavikum á ársfjórðungi.
  • Fjöldi svara að baki hverjum efnisþætti verður breytilegur.
  • Niðurstöðum á mælingu efnisþátta verður skilað samhliða lestri á dagblöðum.