Það voru heitar umræður um auglýsingamál á hádegisverðarfundi ÍMARK þann 26. apríl síðastliðinn. Fundurinn snerist um takmarkanir á auglýsingum og sýndist sitt hverjum.
 

Einn framsögumanna var Ásta Ragnheiður Jóhannesdóttir, þingmaður Samfylkingarinnar. Hún kynnti þingsályktunartillögu sína og annars Samfylkingarfólks um "takmörkun auglýsinga á óhollri matvöru". Þar segir meðal annars að kannaður skuli grundvöllur fyrir "takmörkun auglýsinga á matvöru sem inniheldur mikla fitu, sykur eða salt með það að markmiði að sporna við offitu, einkum meðal barna og ungmenna."

Ennfremur segir þar að "…þessar vörur verði ekki auglýstar í sjónvarpi fyrr en eftir klukkan níu á kvöldin."

Fundarmenn voru hreint ekki sammála málflutningi Ástu og spurðu hana í þaula. Sérstaklega vildu þeir heyra hvernig flutningsmenn hygðust skilgreina hvað væri óholl matvara og hvernig línan yrði dregin í því hvar og hvað mætti auglýsa. Ásta Ragnheiður sagðist ekki hafa áhyggjur af slíkum skilgreiningum og taldi tilganginn helga meðalið. Vandamálið væri slíkt að róttækra aðgerða væri þörf.

Ingólfur Hjörleifsson, framkvæmdastjóri SÍA, lagði áherslu á að þær takmarkanir á auglýsingum sem boðaðar væru í þessum tillögum myndu aldrei leysa það vandamál sem þeim væri ætlað. Það sem f.f. þyrfti að leggja áherslu á væri fræðsla og áróður meðal almennings um heilbrigt mataræði.

Sá ágreiningur sem uppi var á fundinum sýnir svart á hvítu þörfina fyrir aukið samtal milli stjórnvalda og hagsmunaaðila í viðskiptalífinu um hvernig sameiginlega megi leysa vandamál sem upp kunna að koma.